ግጭት ኣብ ሞያሌ ቀጺሉ፤ 50 ሽሕ ሰባት ናብ ኬንያ ስዲዶም

ኣብ መንጎ ክልል ኦሮምያን ሶማልን ኣብ ዝርከብ ዶብ ከተማ ሞያሌ ዝካየድ ዘሎ ግጭት፡ ክሳብ 50 ሽሕ ዝበጽሑ ሰባት ናብ ኬንያ ከም ዝተሰደዱ ውድብ ሕቡራት ሃገራት ኣፍሊጡ። ፖሊስ ኬንያ ከም ዝገለጽዎ፡ ካብቲ ግጭት ዝተተኮሱ ተዅስታት ዶብ ሰጊሮም ኣብ ኬንያ ከም ዝወደቑን ብሰንኩ ድማ መንግስቲ ኬንያ ሓይሊ ጸጥታ ኣብቲ ዶብ ከም ዘዋፈረን ኣረጋጊጾም። ፈደራል መንግስቲ ኢትዮጵያ ይኹን እቶም ክልላት ክሳብ ሕጂ ብዛዕባ እዚ ጉዳይ ዝሃብዎ መግለጺ የለን።

እቲ ግጭት ዝጀመረ ብሰንኪ መትከል ባንዲራ ክልል ሶማሊን ብኡ ኣቢሉ ዝተፈጸመ ቅትለትን ምዃኑ ይግለጽ። ወገናት እቶም ክልላት ንሓድሕዶም ይካሰሱ ኣለዉ። እዚ ምስቲ ዝሓለፈ ዓመት ክልል ሶማሊ ሓደስቲ ወረዳታት ብምቛሙ ኣብ ኦሮሚያ ተፈጢሩ ዝነበረ ናይ ዶብ ባእሲ ዝተተሓዘ ከም ዝኾነ እውን ተገሊጹ።