መንግስቲ ፈደራል ኣብ ትግራይ ግዝያዊ ምምሕዳር ኣቚሙ

መንግስቲ ፈደራል ኢትዮጵያ ኣብ ክልል ትግራይ ንሽዱሽተ ኣዋርሕ ዝጸንሕ ግዝያዊ ምምሕዳር ከምዘቚመ ኣፍሊጡ። እዚ ምምሕዳር ኣብ ትሕቲ መምርሒ መንግስቲ ፈደራል ኮይኑ ኣብቲ ክልል ሰላም ናይ ምውራድ፡ ዝዓነዉ መዋቕራት ናይ ምህናጽን መሰረተ ልማታት ናይ ምጽጋንን ዕማም ኣለዎ። ብተወሳኺ ተፈናቐልቲ ናይ ምምላስ፡ ዕጡቓት ናብ ስሩዕ ህይወት ናይ ምምላስን መጻኢ ምርጫ ናይ ምድላውን ሓላፍነት ተዋሂብዎ ኣሎ። ናይ ፖለቲካ ሳይንስ ሊቅ ዶክተር ደሪቤ መኮንን ከም ዝገለጽዎ፡ እዚ ስጉምቲ ነቲ ኣብቲ ክልል ዘሎ ነባራዊ ኩነታት መሰረት ዝገበረ እዩ። ይኹን እምበር፡ ድሕንነት ናይ ምርግጋጽ፡ ዕጥቂ ናይ ምፍታሕን ተቐባልነት ህዝቢ ናይ ምርካብን ጉዳያት ነቲ ግዝያዊ ምምሕዳር ዝዓበየ ብድሆታት ክኸውን ይኽእል እዩ።