በኬንያ ናይሮቢ እስሊ ሰፈር ባለ 12 ፎቅ ህንጻ ተደረመሰ

የኬንያ ዋና ከተማ በሆነችው ናይሮቢ እስሊ በተባለ አካባቢ በግንባታ ላይ የነበረ ባለ 12 ፎቅ ህንጻ መደርመሱ ተሰምቷል። የናይሮቢ ከተማ አስተዳደር እንደገለጸው፣ በፍርስራሹ ውስጥ ሰዎች ተጠምደው ሊሆኑ እንደሚችሉ በመሰጋቱ የነፍስ አድን ስራ እየተከናወነ ይገኛል። ይህ አካባቢ ብዙ ኢትዮጵያውያን ነጋዴዎች የሚገኙበት በመሆኑ የበርካታ ሰዎችን ስጋት ቀስቅሷል። የአካባቢው ነዋሪዎች እና ምስክሮች እንደተናገሩት፣ ህንጻው በቅርቡ ሊመረቅ የነበረ ሲሆን፣ የሱቅ ቦታዎችን ለመከራየት የመጡ ሰዎች በወቅቱ ህንጻው ውስጥ እንደነበሩ ተጠቁሟል። የድንገተኛ አደጋ ሰራተኞች እና የነፍስ አድን ቡድኖች ፍለጋውን ቀጥለዋል። የህንጻው መፍረስ ምክንያት እስካሁን በውል አልታወቀም።