ቀዳማይ ሚኒስትር ኣብይ ኣሕመድ ንኤርትራ ኣጠንቂቖም

ቀዳማይ ሚኒስትር ኣብይ ኣሕመድ ምስ ኢቲቪ ኣብ ዘካየድዎ ቃለ መሕትት፡ ኤርትራ ኣብ ውሽጣዊ ጉዳይ ኢትዮጵያ ጣልቃ ምእታዋ እንተዘይኣቋሪጻ ሳዕቤኑ ከቢድ ከምዝኸውን ኣጠንቂቖም። ብልጽግና ፓርቲ ኣብ ወግዓዊ ማሕበራዊ ገጹ ከምዝገለጾ፡ እቶም ቀዳማይ ሚኒስትር ኤርትራ ምስ ጸላእቲ ኢትዮጵያ ተሰሊፋ ከምዘላን ንሓይልታት ዕንወት መዕቆቢ ከምዝኾነትን ከሲሶም። ኤርትራ ቅድሚ ሕጂ'ውን ነዚ ክሲ ክትነጽጎ ዝጸንሐት ኮይና፡ መንግስቲ ኢትዮጵያ ናይ ውሽጢ ጸገማቱ ንምሽፋን ንካልእ ኣካል ከምዝውቅስ ትገልጽ። ቀዳማይ ሚኒስትር ኣብይ ብወገኖም፡ መንግስቲ ኤርትራ ንኢኮኖሚ ሃገሩ ከምዘፍረሰ ብምግላጽ፡ እታ ሃገር ካብ ሕጂ ንደሓር ናብ ሰላምን ልምዓትን ክትምለስ ኣተሓሳሲቦም። እዚ ወጥሪ እዚ ብፍላይ ድሕሪ ውዕል ፕሪቶሪያ ኣብ መንጎ ክልቲአን ሃገራት ዘሎ ዝምድና እናተበላሸወ ከምዝመጸ ዘመላኽት እዩ።