ኣብ ከተማ ሞያሌ ዝተወልዐ ግጭት፡ ሞትን መፈናቀልን የኸትል ኣሎ

ኣብቲ ኣብ ዶብ ክልል ኦሮምያን ሶማልን ዝርከብ ከተማ ሞያሌ ዝተወልዐ ግጭት፡ ህይወት ሰባት እናሓለፈን ነበርቲ እናተመዛበሉን ይርከቡ። ከንቲባ ከተማ ሞያሌ ኣቶ ገልማ ኮርቻ ከምኡውን ነበርቲ ከም ዝገለጽዎ፡ እቲ ግጭት ኣብቲ ዶብ ኣብ ዘይግቡእ ቦታ ተተኺሉ ብዝተባህለ ባንዴራን ተኣሳሲሩ ዝመጸ ናይ ምምሕዳር ንታባን ዝተበገሰ እዩ። እቲ ኵነታት ናብ ዕጡቕ ግጭት ተቐይሩ፡ መገዲታት ተዓጽዩን ነበርቲ ከም ዝተመዛበሉን ይግለጽ ኣሎ። ነበርቲ ኣብታ ከተማ ከቢድ ኣጽዋር ከም ዝስማዕን ህጻናትን ሓዊሱ ብዙሓት ሰባት ከም ዝሞቱ ይዛረቡ እኳ እንተዀኑ፡ ግና ንኽንደይ ሰባት ከም ዝሞቱ ብገለልተኛ ኣካል ኣይተረጋገጸን። ሓይልታት ጸጥታ ድሕሪት ከም ዝበሉን እቲ ከባቢ ሕጂ’ውን ተለዋጢ ኵነታት ከም ዘለዎ ይንገር።