ሸውዓተ ዕጡቓት ጉጅለታት ኢትዮጵያ ኣብ ልዕሊ መንግስቲ ኣብይ ኣሕመድ "ኪዳን ንህልውና" መስሪተን

ሸውዓተ ዕጡቓት ጉጅለታት ኢትዮጵያ "ኪዳን ንህልውና" ዝተሰምየ ሓድሽ ጥምረት ከምዝመስረታ ኣፍሊጠን። እዚ ስብስብ፡ ፋኖ (ኣምሓራ)፣ ህወሓት (ትግራይ)፣ ሰራዊት ሓርነት ኦሮሞ (OLA)፣ ኦብነግ (ኦጋዴን)፣ ኡጉጉሞ (ዓፋር)፣ ምንቅስቓስ ሓርነት ህዝብታት ቤኒሻንጉል ከምኡ'ውን ደሞክራስያዊ ምንቅስቓስ ህዝብታት ጉሙዝ ዘካተተ እዩ። ኣቦ መንበር እቲ ጥምረት ዘመነ ካሴ ከምዝገለጽዎ፡ እቲ ኪዳን መንግስቲ ቀዳማይ ሚኒስተር ኣብይ ኣሕመድ ካብ ስልጣን ኣውሪዱ "መሰጋገሪ መንግስቲ" ንምቛም ዝዓለመ እዩ።

እቲ ጉጅለ፡ መንግስቲ ኣብ ጸጥታ፣ ምሕደራን መነባብሮን ውድቀት ኣጋጢሙዎ ኣሎ ብምባል ይኽስስ። መንግስቲ ኢትዮጵያ ቀደም ሲል ነዞም ቡድናት "ናይ ወጻኢ ሓይልታት ተላላኪ" እዮም ኢሉ ይኸስሶም ከምዝነበረ ዝዝከር እዩ። ብታሪኽ ኣፈላላይ ዝነበሮም እዞም ሸውዓተ ዕጡቓት ሓይልታት ከመይ ናብ ስምምዕ ከምዝበጽሑ ሕቶታት ይለዓል ኣሎ።