ኮምሽን ሃገራዊ ዘተ ኢትዮጵያ ስርሑ ዛዚሙ

ሃገራዊ ኮምሽን ዘተ ኢትዮጵያ ን4 ዓመትን 8 ኣዋርሕን ድሕሪ ምጽናሕ ወግዓዊ ስርሑ ዛዚሙ። እቲ ኮምሽን ንነዊሕ ዓመታት ዝጸንሑ ዘይምርድዳኣት ብዘተ ንምፍታሕ ዝቘመ እኳ እንተኾነ፡ ካብ ብዙሓት ወገናት ትሪር ተቓውሞን ክስታትን ክቐርበሉ ጸኒሑ። ዋና ኮምሽነር ፕሮፌሰር መስፍን ኣርኣያ፡ እቲ ኮምሽን 394 ምኽረ-ሓሳባት ከም ዘአከበ ሓቢሮም፡ እዞም ሓሳባት ናይ መወዳእታ ውሳነ ዘይኮኑስ ንመዘተ ዝሕግዙ ምዃኖም ኣረዲኦም። ስራሕ እቲ ኮምሽን ብወግዒ እንተተዛዘመ፡ ነቶም ምኽረ-ሓሳባት ንህዝቢ ናይ ምቕራብ ሓላፍነት ናብ ቤት ምኽሪ ወከልቲ ህዝቢ ተሰጋጊሩ ኣሎ። ይዅን እምበር፡ ኣብ ልዕሊ ገለ ኣባላት እቲ ኮምሽን ዝነበረ ክሲ ወገናውነትን ዘይምግልጻዊነትን ገና ኣከራኻሪ ኮይኑ ይቕጽል ኣሎ።