ምርመራ ቢቢሲ፡ ሓይልታት ዳዕመ-ሰሪዕ ኣብ ኣል-ፋሸር ሆስፒታላት ዒላማ ከም ዝገበሩ ኣረጋጊጹ

ምርመራ ቢቢሲ ከም ዘርእዮ፡ ኣብ እዋን ኲናት ሱዳን ሓይልታት ዳዕመ-ሰሪዕ (RSF) ኣብ ኣል-ፋሸር ዝርከቡ ሆስፒታላት ዒላማ ገይሮም ብተደጋጋሚ መጥቃዕቲ ፈጺሞም እዮም። ካብ ግንቦት 2024 ክሳብ ጥቅምቲ 2025 ኣብ ዝነበረ 17 ኣዋርሕ ከበባ፡ እንተወሓደ 43 መጥቃዕትታት ኣብ ልዕሊ ትካላት ጥዕና ተፈጺሙ።

ኮምሽነር ሰብኣዊ መሰላት ውድብ ሕቡራት ሃገራት ቮልከር ቱርክ፡ እዚ ተግባር ከቢድ ጥሕሰት ኣህጉራዊ ሰብኣዊ ሕግን ምናልባት እውን ገበን ኲናትን ክኸውን ከም ዝኽእል ገሊጾም። ኣብዚ እዋን እዚ እንተወሓደ 55 ሰብሞያ ሕክምና ተቐቲሎም፡ 120 ቆሲሎም፡ 10 ድማ ተጨውዮም ወይ ተሰውሮም። ሓይልታት ዳዕመ-ሰሪዕ እቶም ሆስፒታላት ወተሃደራዊ ዕላማ ነይርዎም ብምባል ክስታት እንተ ነጸጉ እውን፡ ሰራሕተኛታት ሕክምናን ካልኦት ምንጭታትን ግን እቲ መጥቃዕትታት ብውጥን ዝተገብረ ምንባሩ የረድኡ። ሆስፒታላት ቦታ እናቐየሩ እኳ እንተተሃድጉ፡ ዳግም መጥቃዕቲ ይወርዶም ምንባሩ እቲ ጸብጻብ ይሕብር።