ሃገራዊት ጋንታ ኤርትራ ብሰንኪ ስታድዮም ጸወታታታ ኣብ ወጻኢ ከተካይድ ትግደድ ኣላ

ሃገራዊት ጋንታ ኩዕሶ እግሪ ኤርትራ (ኣግማል ቀይሕ ባሕሪ) ድሕሪ ናይ 18 ዓመታት ብኩራት ናብ መጻረዪ ዋንጫ ኣፍሪቃ 2027 እንተተመለሰት’ኳ፡ ብሰንኪ ብቑዕ መጻወቲ ሜዳ ምስኣና ነቶም ኣብ ሜዳኣ ከተአንግዶም ዝግብኣ ጸወታታት ኣብ ከም ሞሮኮን ግብጽን ዝኣመሰላ ሃገራት ከተካይድ ትግደድ ኣላ። እዚ ድማ ነቶም ኣብ ውሽጢ ሃገር ዝርከቡ ደጋፊኣ ንሃገራዊት ጋንታኦም ብኣካል ናይ ምእላይ ዕድል ከም ዘይረኽቡ ገይሩዎም ይርከብ። እቶም ኣብ ኣስመራ ዝርከቡ ታሪኻውያን ስታድዮማት (ካምፖ ቺቸሮን ስታድዮም ኣስመራን) ብሰንኪ ዘይምጽጋኖምን ምእራግ ሰብ-ሰርሖ ሳዕርን ንጸወታታት ኣህጉራዊ መዐቀኒታት ካፍ ዘየማልኡ ኰይኖም ኣለው። ቢቢሲ ብዛዕባዚ ጉዳይ ንሃገራዊ ፈደረሽን ኩዕሶ እግሪ ኤርትራ ሕቶ ኣቕሪቡ መልሲ ኣብ ምጽባይ ይርከብ። ከም ደቡብ ሱዳን፣ ሞሪታንያን ኬፕ ቨርደን ዝኣመሰላ ሃገራት ኣፍሪቃ ንሓገዝ 'ፊፋ ፎርዋርድ' ብምጥቃም ዘመናውያን ስታድዮማት እንተሃነጻ፡ ኤርትራ ግን ነዚ ዕድል ክትጥቀመሉ ኣይካኣለትን።