መንግስታት ኣመሪካን ብሪጣንያን ብዛዕባ ጸጥታ ኢትዮጵያ መጠንቀቕታ ኣውጺኦም

ኤምባሲ ኣመሪካ ኣብ ኢትዮጵያ ኣብ ልዕሊ ወተሃደራዊ ትሕተ-ቅርጺ ዒላማ ዝገበሩ መጥቃዕትታት ሚሳይል ክህልዉ ከም ዝኽእሉ ብምጥቃስ ዜጋታቱ ናብ ሰሜን ኢትዮጵያ ከይጓዓዙ ኣጠንቂቑ። መንግስቲ ዓባይ ብሪጣንያ እውን ነቲ ማዕዳ መገሻኡ ብምሕዳስ፡ ናብ ትግራይ፡ ኣምሓራን ጋምቤላን ከምኡውን ካልኦት ከባቢታት መገሻ ከይግበር መኺሩ። እዚ መጠንቀቕታታት ነቲ ኣብ ኢትዮጵያ ዘሎ ወጥሪ ዘርኢ እዩ። ኣብዚ ቀረባ እዋን ነበርቲ ኣዲስ ኣበባ ኣብ ከባቢ 'ጦር ኃይሎች' ድምጺ ነትጕ ከም ዝሰምዑ ገሊጾም እዮም። መንግስቲ ኢትዮጵያ ብዛዕባ እቲ ነትጕ ወግዓዊ ምላሽ ኣይሃበን።