ኣብ ኣመሪካ ፍሎሪዳ ናይ ብሕቲ ነፋሪት ተከስኪሳ፤ 9 ሰባት ሞይቶም

ኣብ ኣመሪካ ክፍለ-ሃገር ፍሎሪዳ ሓንቲ ናይ ብሕቲ ነፋሪት ሊርጄት 60 ኣብ መንበሪ ገዛውቲ ተከስኪሳ ኣብ ውሽጣ ዝነበሩ ትሽዓተ ሰባት ህይወቶም ከም ዝሓለፈ ክፍሊ መጓዓዝያ ኣመሪካ ኣፍሊጡ። እታ ነፋሪት ካብ ኦስቲን፡ ቴክሳስ ተላዒላ ናብ ባሃማስ ትምርሕ ከም ዝነበረት ተገሊጹ። ቅድሚ እቲ ሓደጋ እቲ ፓይለት ህጹጽ ኵነታት ብምእዋጅ ነፋሪት ብቕልጡፍ ትወርድ ከም ዘላን ግዜ ከም ዘየለንን ናብ መቈጻጸሪ ማእከል ኣጠንቂቑ ነይሩ። ኣብ ማሕበራዊ መራኸቢታት ዝወጸ ምስሊ ከም ዘርእዮ፡ እታ ነፋሪት ልክዕ ከም ሚሳይል ናብ መሬት ብምውዳቕ ብርቱዕ ፍንጀራ ፈጢራ። ኣመሓዳሪ ፍሎሪዳ ሮን ደሳንቲስ እቲ ፍጻመ ዘስካሕክሕ ከም ዝዀነ ገሊጹ፡ ኣብ መሬት ዝነበረ ሰብ ከም ዘይተጎድአ ኣረጋጊጹ። ሕጂ እውን መርመራ እቲ ሓደጋ ይካየድ ኣሎ።