ሓይሊ ሰላም ትግራይ ሰራዊት ኤርትራ ኣብቲ ውግእ ይሳተፍ ኣሎ ክብል ከሲሱ፤ ኤርትራ ነጺጋቶ

ኣብ መንጎ ክልላት ትግራይ፣ ኣምሓራን ዓፋርን ኣብ ዘሎ ዶባት ዳግም ኣብ ዝተወልዐ ኲናት፡ ምስ ሰራዊት ምክልኻል ኢትዮጵያ ተሰሊፉ ንሓይልታት ትግራይ ዝዋጋእ ዘሎ 'ሓይሊ ሰላም ትግራይ' (ሓራ መሬት) ምክትል ኣዛዚ ኰሎኔል በርሀ ባራኺ ሰራዊት ኤርትራ ኣብቲ ውግእ ብቐጥታ ይሳተፍ ኣሎ ክብል ከሲሱ። ኰሎኔል በርሀ ኣብ ግምባር ዓፋር ከባቢታት ኢረብትን ኣብዓላን ሰራዊት ኤርትራን ዕጡቓት ኡጉጉሞን ምስ ሓይልታት ትግራይ ይዋጋኡ ምህላዎምን፡ እቲ ናይ ሕጋዊ ሰራዊትን መካናይዝድን ተሳትፎ ምዃኑ ኣረዲኡ። ብወገን ኤርትራ፡ ሚኒስተር ዜና የማነ ገብረመስቀል ነዚ ክሲ ነጺጉ፣ ስርዓት ብልጽግና ካብ ውሽጣዊ ቅልውላዋቱ ኣቓልቦ ንምጥምዛዝ ዝፈጥሮ ልሙድ ምስምስ እዩ ክብል ምላሽ ሃቢሉ። ሓላፍቲ ክልል ዓፋር እውን ወተሃደራት ኤርትራ ዶብ ጥሒሶም ኣትዮም ይዋግኡ ኣለው እንተበሉ፡ ፊልድ ማርሻል ብርሃኑ ጁላ ግን ብግብጽን ሱዳንን ምስ ዝድገፉ ሓይልታት ይዋጋኡ ምህላዎም ጥራይ ገሊጾም።