ተመራመርቲ ናይ ተባዕታይ ሃመማ ሓንጎል ምሉእ ብምሉእ ብካርታ ነዲፎም

ተመራመርቲ ካብ ዩኒቨርሲቲ ካምብሪጅ ዝዀኑ ብፕሮፌሰር ግሪጎሪ ጀፈሪስ ዝመራሕቲ፡ ኣብ ሓንጎል ተባዕታይ ሃመማ ዝርከቡ ኵሎም 124 ሚልዮን ምትእስሳር ዋህዮታት መትኒ ብመልክዕ 3D ካርታ ነዲፎምኦም። እቶም ተመራመርቲ ነዚ ካርታ ምስቲ ቅድሚ ክልተ ዓመት ዝተሰርሐ ናይ ጓል ኣንስተይቲ ሃመማ ናይ ሓንጎል ካርታ ብምንጽጻር ኣብ መንጎ ክልቲኦም ጾታታት ዘሎ ናይ መትኒ ፍልልያት ኣለልዮም። እቲ መጽናዕቲ ከም ዘርእዮ፡ ተባዕታይን ኣንስተይቲን ሃመማ ኣስታት 95 ሚእታዊት ናይ ሓንጎል ዋህዮታት ዝካፈሉ እንተዀኑ፡ እቶም ዝተረፉ 5 ሚእታዊት ግን ኣብ ባህሪ ዓቢ ፍልልይ ዘምጽኡ እዮም። እዚ ፍልልይ እዚ ምስ ኣብ ተባዕትዮ ዝርአ ዓመጽ፡ ምኩሻም፡ ምድራፍ ዜማታት ፍቕርን ዝተኣሳሰር ምዃኑ ዶክተር ኢዛቤላ ቤኬትን ዶክተር ፊሊፕ ሽለገልን ገሊፆም። እዚ ፍልልያት እዚ ተመራመርቲ ሰረታት (ጂናት) ንባህርያት ብኸመይ ከም ዝጸልዉዎ ንምርዳእ ዓቢ ስጕምቲ ንቕድሚት ዝወስዶም እዩ። ተመራመርቲ እዚ መጽናዕቲ ንባህርያት ደቂ ሰባትን ከም ኦቲዝምን ስኪዞፍረኒያን ንሓንጎል ዝጸልዉ ኵነታትን ብዝበለጸ ንምርዳእ ከምኡ እውን ንዓውዲ ኪነታዊ ብልሒ (AI) ንምምሕያሽ ክሕግዝ ከም ዝኽእል ተስፋ ይገብሩ።