ኣብ ትግራይ ዝተኸፍቱ ናይ ባንክ ሕሳባት ብምዕፃዎም ኣብ ልዕሊ ነበርቲ ዓቢይ ፀገም ፈጢሩ

ኣብ መንጎ ሓይልታት ትግራይን ሰራዊት ፌዴራልን ብሰለስተ ግንባራት ብዝተላዕለ ሓድሽ ግጭት ስዒቡ፡ ኣብቲ ክልል ናይ ትራንስፖርትን ቴሌኮምን ኣገልግሎታት ተቛሪፁ ይርከብ። ብተወሳኺ ኣብ ትግራይ ዝተኸፍቱ ናይ ባንክ ሕሳባት ብዝተገብረ እገዳ ምኽንያት ናይ ሞባይል ባንኪንግን ኤቲኤምን ኣገልግሎት ደው ኢሉ ኣሎ። እዚ ውሳነ እዚ ኣብቲ ክልል ንዝርከቡ ነበርቲ ጥራይ ዘይኰነስ፡ ወጥሪ ፈሪሖም ናብ ኣዲስ ኣበባን ካልኦት ቦታታትን ንዝገዓዙ ሰባት ንመግቢ፡ ንትራንስፖርትን ካልእ ዘድልዮም ወጻኢታትን ክኸፍሉ ብዘይምኽኣሎም ኣብ ዓቢይ ፀገም ወዲቖም ይርከቡ። ብዙሓት ሰባት ምስ ስድርኦም ዝነበሮም ርክብ ብሰንኪ ምቍራፅ ቴሌፎን ካብ ምእታዉ ብተወሳኺ ገንዘቦም ክንቀሳቐስ ብዘይምኽኣሉ ይእንግልቱ ኣለዉ። ኣብ ገለ ጨንፈራት ባንኪ ንግዲ ኢትዮጵያ ኣብ ኣዲስ ኣበባ ዝተዓፅወ ሕሳባት ንምኽፋት ፃዕርታት እኳ እንተተገብረ፡ እቲ ፀገም ግን ገና ኣይተፈታሕን።