ኢትዮጵያ ኣብ መጀመሪያ ርብዒ ዓመት 1.432 ቢሊዮን ዶላር ናይ ወፃኢ ኢንቨስትመንት ረኺባ

ኮሚሽን ኢንቨስትመንት ኢትዮጵያ ንውፅኢት ርብዒ ዓመት በጀት 2019 ዕላዊ ገይሩ። እቲ ኮሚሽን ኣብቲ እዋን 0.9 ቢሊዮን ዶላር ንምርካብ ተተሊሙ እኳ እንተነበረ፡ 1.432 ቢሊዮን ዶላር ናይ ወፃኢ ቀጥታ ኢንቨስትመንት ክረክብ ከምዝኸኣለ ኣፍሊጡ። እዚ ኣፈፃፅማ ካብ ዝሓለፈ ዓመት ተመሳሳሊ እዋን ብ49 ሚእታዊት ዕብየት ዘርአየ እዩ።

ተወሳኺ እቲ ኮሚሽን ኣብቲ ርብዒ ዓመት 179 ሓደስቲ ፍቃድ ኢንቨስትመንት ሂቡ። ካብዚኦም 57 ኣብ ፍሉይ ዞባታት ኢኮኖሚ ዝተመዝገቡ ኮይኖም፡ እዚ ካብ ዝሓለፈ ዓመት ብ45.5 ሚእታዊት ዝበለፀ እዩ። ከም ፀብፃብ እቲ ኮሚሽን፡ 81 ፕሮጀክትታት ናብ ትግባረ ክኣትዉ ከለዉ 66 ድማ ናብ ማምረት ተሰጋጊሮም ኣለዉ። ብተወሳኺ ኣብ ወፃኢ ንግዲ 238 ሚሊዮን ዶላር ገቢ ከምዝተረኽበን ንልዕሊ 22 ሽሕ ዜጋታት ሓድሽ ናይ ስራሕ ዕድል ከምዝተፈጠረን ኮሚሽን ኣረጋጊፁ።