90 በመቶው የኢትዮጵያ የሻይ ምርት ለሀገር ውስጥ ፍጆታ እንደሚውል ተገለጸ

የኢትዮጵያ ቡናና ሻይ ባለሥልጣን እንዳስታወቀው፣ በአገሪቱ ከሚመረተው የሻይ ቅጠል 90 በመቶው ለሀገር ውስጥ ፍጆታ የሚውል ሲሆን 10 በመቶው ብቻ ለውጭ ገበያ ይቀርባል። የባለሥልጣኑ የቡና፣ ሻይና ቅመማ ቅመም ልማት ሥራ አስፈጻሚ አቶ ፍቃዱ ደፈረስ እንደገለጹት፣ አገሪቱ ከሻይ ወጪ ንግድ በአማካይ 1 ነጥብ 86 ሚሊዮን ዶላር ታገኝ ነበር። በተያዘው በጀት ዓመት ምርቱን ወደ 14 ሺህ ቶን በማሳደግ 2 ሚሊዮን ዶላር ገቢ ለማግኘት ታቅዷል። ለሻይ ልማት ተስማሚ የሆነ መሬትና የአየር ሁኔታ ቢኖርም ምርታማነቱ ዝቅተኛ በመሆኑ፣ መንግሥት የሻይ ማሳን ከ6 ሺህ 396 ወደ 10 ሺህ 628 ሄክታር ለማሳደግ እየሠራ ነው። በኦሮሚያ እና በደቡብ ምዕራብ ኢትዮጵያ ክልሎች በድምሩ 2 ሺህ 670 ሄክታር ተጨማሪ የሻይ ችግኝ ተተክሏል።