90% Omishni Shaahii Itiyoophiyaa Gabaa Keessaaf Oola

Abbaan Taayitaa Bunaa fi Shaahii Itiyoophiyaa akka ibsetti, omishni shaahii biyyattii keessatti omishamu keessaa dhibbeentaa 90 gabaa keessaaf kan oolu yoo ta'u, dhibbeentaa 10 qofa gara gabaa alaa erguun beekameera. Hoji gaggeessaan misooma bunaa, shaahii fi urgooftuu abbaa taayitichaa obbo Fiqaduu Daafarasaa akka ibsanitti, biyyattiin gurgurta shaahii irraa giddu galeessaan doolaara miiliyoona 1.86 argachaa turteetti. Bara baajata ammee kanatti omisha gara toonii 14,000tti guddisuun doolaara miiliyoona 2 argachuuf karoorfameera. Haalli qilleensaa fi lafti shaahiif mijataa ta'us omishtummaan waan hin guddanneef, mootummaan lafa shaahii hektaara 6,396 irraa gara 10,628tti guddisuuf hojjachaa jira. Naannoo Oromiyaa fi Kibba-Lixaa Itiyoophiyaatti hektaara 2,670 irratti biqiltuun shaahii dabalataa dhaabameera.