90 ሚኢታዊ ናይ ኢትዮጵያ ፍርያት ሻሂ ንውሽጢ ሃገር ከም ዝውዕል ተገሊጹ

ኣብ ኢትዮጵያ ካብ ዝፍረ ሻሂ 90 ሚኢታዊ ንውሽጢ ሃገር ከም ዝውዕልን 10 ሚኢታዊ ጥራይ ንወጻኢ ከም ዝልኣኽን በዓል መዚ ቡን ሻሂ ኢትዮጵያ ኣፍሊጡ። ሓላፊ ልምዓት ቡን ሻሂን ቅመማ ቅመምን እቲ በዓል መዚ ኣቶ ፍቃዱ ደፈረስ ከም ዝገለጽዎ፣ እታ ሃገር ካብ ወጻኢ ንግዲ ሻሂ ብማእከላይ 1 ነጥቢ 86 ሚልዮን ዶላር ትረክብ ኔራ። ኣብዚ በጀት ዓመት ድማ ፍርያት ናብ 14 ሽሕ ቶን ብምዕባይ 2 ሚልዮን ዶላር እቶት ንምርካብ ተታሊሙ ኣሎ። ንልምዓት ሻሂ ዝሰማማዕ መሬትን ኣየርን እኳ እንተሃለወ፡ ፍርያት ኣብቲ ዝድለ ብርኪ ስለዘይበጽሐ፣ መንግስቲ ስፍሓት መሬት ሻሂ ካብ 6 ሽሕ 396 ሄክታር ናብ 10 ሽሕ 628 ሄክታር ንምዕባይ ይስርሕ ኣሎ። ኣብ ክልል ኦሮሚያን ደቡብ ምዕራብ ኢትዮጵያን ድማ ብድምር 2 ሽሕ 670 ሄክታር ተወሳኺ ፈልሲ ሻሂ ተተኺሉ ኣሎ።