ኣብ ወረዳ ኣርሲ-ሺርካ ብዕጡቓት ኣብ ዝተፈጸመ መጥቃዕቲ ህይወት ብዙሓት ሰባት ሓሊፉ

ኣብ ክልል ኦሮሚያ ወረዳ ኣርሲ-ሺርካ ቀበሌ ቢርቦና ጮሌ፣ ቀዳም ጥቅምቲ 14፣ 2019 ዝተዓጠቑ ሓይልታት ኣብ ዝፈጸምዎ መጥቃዕቲ ልዑል ቁጽሪ ዘለዎ ህይወት ሰባት ከምዝሓለፈ ዓይኒ መሰኻኽርን ግዳያትን ገሊጾም። ግዳያት እቲ መጥቃዕቲ መንበሪ ኣባይቲ ምቅጻልን ኣብ ልዕሊ ንጹሃን ግፍዓዊ ቅትለት ምፍጻምን ከምኡ'ውን ነበርቲ እቲ ከባቢ ምምዝባሎም ገሊጾም። እቶም ኣጥቃዕቲ ኣብ ዝኸፈትዎ መጥቃዕቲ ኣስታት 55 ሰባት ከምዝሞቱ፣ ካብቶም ዝሞቱ ውሽጢ ድማ ደቂ ኣንስትዮን ህጻናትን ከምኡ'ውን ጸጥታ ኣካላት እቲ ከባቢ ይርከብዎም። ሓላፊ ቢሮ ኮሚዩኒኬሽን ክልል ኦሮሚያ ኣቶ ሃይሉ ኣዱኛ እቲ መጥቃዕቲ ርእሱ 'ጽምዶ' ኢሉ ዝጽውዕ ሓይሊ ናይ ብሄርን ሃይማኖትን ግጭት ንምፍጣር ዝገበሮ ፈተነ ምዃኑ ብምግላጽ፣ መንግስቲ ኣድላዪ ስጉምቲ ይወስድ ከምዘሎ ኣፍሊጦም። ግዳያት እቲ ኩነታት መንግስቲ ቀጻሊ ሰላም ከምጽኣሎምን ካብ ንብረቶም ዝተመዛበሉ ክጣየሱ ይሓቱ ኣለዉ።