የሩሲያና አፍሪካ ጉባኤ በሞስኮ ተጠናቀቀ

የሶስተኛው የሩሲያና አፍሪካ ጉባኤ ለሁለት ቀናት በሞስኮ ተካሂዶ በጋራ መግለጫና በተለያዩ ውሳኔዎች ተጠናቋል። ከ54ቱ የአፍሪካ ሀገራት 48ቱ የተሳተፉ ሲሆን፣ ከነዚህ ውስጥ 22ቱ ሀገራት በፕሬዝዳንቶቻቸው የተወከሉ ናቸው። ጉባኤው በዋናነት በንግድ፣ ኢንቨስትመንት፣ ኢነርጂ፣ ግብርና እና በሳይንስና ቴክኖሎጂ ትብብር ላይ ያተኮረ ነበር። ፕሬዝዳንት ፑቲን ምዕራባውያን በአፍሪካ ላይ ያላቸውን አመለካከት በመተቸት፣ ሩሲያ ከቅኝ አገዛዝ አስተሳሰብ የራቀና በጋራ ተጠቃሚነት ላይ የተመሰረተ ግንኙነት እንደምትፈልግ አስታውቀዋል።

ጠቅላይ ሚኒስትር ዐቢይ አህመድ በጉባኤው ተገኝተው ኢትዮጵያ በግብርና፣ በምግብ ዋስትና እና በኒውክለር ሃይል ልማት መስኮች ከሩሲያ ጋር በትብብር ለመስራት ፍላጎት እንዳላት ገልጸዋል። የሩሲያና አፍሪካ የንግድ ልውውጥ በአሁኑ ወቅት ከቻይና እና አውሮፓ ጋር ሲነጻጸር ዝቅተኛ መሆኑ በጉባኤው የተነሳ ሲሆን፣ ትብብሩን ለማሳደግ ስምምነት ተደርሷል። በጉባኤው የተላለፉ ውሳኔዎችን ወደ ተግባር ለመቀየር መዋቅር እንደሚያስፈልግ የተስማሙ ቢሆንም፣ የሩሲያ ጦርነትና ውስንነቶች ተግባራዊነቱ ላይ ጥርጣሬዎችን ፈጥረዋል።