ዴንማርክ እና ሩዋንዳ ከኢትዮጵያ ጋር ያላቸውን የውሃና የኢነርጂ ትብብር ለማጠናከር ፍላጎት አላቸው

በአዲስ አበባ እየተካሄደ ባለው 3ኛው የኢትዮጵያ የውሃና የኢነርጂ ሳምንት ላይ የዴንማርክ እና የሩዋንዳ አምባሳደሮች በዘርፉ ያላቸውን ትብብር ለማጠናከር ፍላጎታቸውን ገልጸዋል። የዴንማርክ አምባሳደር ሱኔ ክሮግስትሩፕ አገራቸው በአንድ ዋሽ ብሔራዊ ፕሮግራም፣ በአየር ወለድ የከርሰ ምድር ውሃ ካርታ እና በአሴላ የንፋስ ኃይል ማመንጫ ፕሮጀክቶች ተሳትፎ እንዳላት አስታውሰዋል። ለወደፊቱም በቴክኒክ ድጋፍ እና በግል ኢንቨስትመንት ዘርፉን ለማሳደግ ማቀዳቸውን ገልጸዋል።

የሩዋንዳው አምባሳደር ሜጀር ጀነራል ቻርለስ ካራምባ በበኩላቸው የውሃና የኢነርጂ ዘርፎች ለኢኮኖሚ እድገት ያላቸውን ፋይዳ አጽንኦት ሰጥተዋል። በኢትዮጵያ እየተካሄደ ያለው የውሃና የኢነርጂ ሳምንት ባለድርሻ አካላት ልምድ የሚለዋወጡበት እና አዳዲስ የኢንቨስትመንት አማራጮች የሚዳሰሱበት መድረክ መሆኑን ጠቅሰዋል። ሩዋንዳ በዘርፉ ያላትን ቁርጠኝነት በመግለጽ ከኢትዮጵያ ጋር በሁለትዮሽ ግንኙነት ለመስራት ዝግጁ መሆኗን አረጋግጠዋል።