Denmark fi Rwanda hidhata bishaan fi anniisaa Itoophiyaa wajjin qaban cimsuu barbaadu

Torbaan Bishaan fi Anniisaa Itoophiyaa 3ffaa Finfinneetti gaggeeffamaa jiru irratti, ambaasaadonni Denmark fi Rwanda tumsa damee kanaa cimsuuf fedhii qaban ibsaniiru. Ambaasaaddarri Denmark Sune Krogstrup akka jedhanitti, biyyi isaanii pirojektiiwwan akka One WASH, kaartaa bishaan lafa jalaa fi buufata anniisaa qilleensaa Asallaa keessatti hirmaannaa qabaachuu isaanii yaadachiisaniiru. Fuuldurattis deeggarsa teeknikaa fi invastimantii dhuunfaa qindeesuun damee kana gabbisuuf karoorfataniiru.

Ambaasaaddarri Rwanda Major General Charles Karamba gamasaaniin, bishaanii fi anniisaan guddina dinagdeetiif faayidaa guddaa akka qaban ibsaniiru. Qophiin Itoophiyaatti gaggeeffamaa jiru kun qaamoleen dhimmi ilaallatu muuxannoo itti waljijjiiran fi carraawwan invastimantii haaraa itti qoratan ta'uu ibsaniiru. Rwanda qulqullina bishaan fi nageenya anniisaaf murannoo qabdu mirkaneessuun, Itoophiyaa wajjin tumsa biyyoota lamaanii cimsuuf qophiidha jedhaniiru.