ዴንማርክን ሩዋንዳን ምስ ኢትዮጵያ ዘለወን ዝምድና ማይ ጸዓትን ንምሕያል ይሰርሓ ኣለዋ

ኣብ ኣዲስ ኣበባ እናተኻየደ ኣብ ዘሎ ሳልሳይ ሰሙን ማይን ጸዓትን ኢትዮጵያ፡ ኣምባሳደራት ዴንማርክን ሩዋንዳን ኣብቲ ዓውዲ ዘለዎም ምትሕብባር ንምሕያል ዘለዎም ድሌት ገሊጾም። ኣምባሳደር ዴንማርክ ሱኔ ክሮግስትሩፕ፡ ሃገሮም ኣብ ብሄራዊ መደብ ዋሽ (One WASH)፡ ካርታ ማይ ትሕቲ መሬትን ፕሮጀክት ጸዓት ንፋስ ኣሰላን ተሳትፎ ከምዘለዋ ኣዘኻኺሮም። ኣብ መጻኢ እውን ብቴክኒካዊ ሓገዝን ውልቃዊ ኢንቨስትመንትን ነቲ ዓውዲ ንምዕባይ ከምዝወጠኑ ገሊጾም።

ኣምባሳደር ሩዋንዳ ሜጀር ጀነራል ቻርለስ ካራምባ ብወገኖም፡ ዓውዲ ማይን ጸዓትን ንዕቤት ቁጠባ ዘለዎም ረብሓ ኣጉሊሖም። እቲ ኣብ ኢትዮጵያ ዝካየድ ዘሎ ሰሙን ማይን ጸዓትን፡ መዳርግቲ ኣካላት ተሞክሮ ዝለዋወጥሉን ሓደስቲ ዕድላት ኢንቨስትመንት ዝግምገሙሉን መድረኽ ምዃኑ ጠቒሶም። ሩዋንዳ ኣብቲ ዓውዲ ዘለዋ ቆራጽነት ብምግላጽ፡ ምስ ኢትዮጵያ ብኽልተኣዊ ዝምድና ንምስራሕ ድልውቲ ምዃና ኣረጋጊጾም።