ኢትዮጵያ ብሓጋይ መስኖ 4.5 ሚልዮን ሄክታር መሬት ስርናይ ንምልማዕ ተዳልያ

ሚኒስቴር ሕርሻ ኢትዮጵያ ኣብ ዝቕጽል ወቕቲ ሓጋይ 4.5 ሚልዮን ሄክታር መሬት ብስርናይ ንምልማዕ መደብ ከም ዘለዎ ኣፍሊጡ። ሓላፊ ልምዓት ሰሊል ሚኒስቴር ኣቶ ተሾመ ገለቱ ከም ዝገለጽዎ፡ እዚ መደብ እዚ ኢትዮጵያ ኣብ መግብን ኢኮኖምን ርእሳ ንምኽኣል ትገብሮ ዘላ ጻዕሪ ኣካል እዩ። ቅድሚ ሕጂ ኢትዮጵያ ድሌታ ንምምላእ ኣብ ዓመት ካብ 700 ሚልዮን ክሳብ 1 ቢልዮን ዶላር ወጻኢ ትገብር ነይራ።

ኣብ ዝሓለፈ ዓመት 2025/26 ብዝተገብረ ጻዕሪ ኣብ 3.78 ሚልዮን ሄክታር መሬት 149 ሚልዮን ኩንታል ስርናይ ተረኺቡ። ኣብዚ ሕጂ ዝተታሕዘ መደብ ድማ 189 ሚልዮን ኩንታል ንምርካብ ተታሊሙ ኣሎ። እዚ መደብ እዚ ንሓረስቶት ካብ ዝናብ ጥገኝነት ኣገላጊሉ፡ ብመስኖ ተጠቂሞም ኣብ ዓመት ክሳብ ሰለስተ ግዜ ንኽዓጽዱ ኣኽኢልዎም እዩ።