አልጀዚራ 30ኛ ዓመት በዓሉን በአዲስ አበባ አከበረ

አልጀዚራ የተመሠረተበትን 30ኛ ዓመት ምክንያት በማድረግ በአዲስ አበባ ዝግጅት ተካሂዷል። በዝግጅቱ ላይ የኢትዮጵያ ሚዲያ ባለስልጣን ዋና ዳይሬክተር ሀይማኖት ዘለቀ፣ የኢትዮጵያ መንግስት የሚዲያ ነፃነትን ለማረጋገጥ እና አለም አቀፍ ሚዲያዎች በሀገሪቱ በነፃነት እንዲሰሩ ለማድረግ እየሰራ መሆኑን ተናግረዋል። የአፍሪካ ህብረት ኮሚሽን ምክትል ሊቀመንበር ሴልማ ማሊካ ሃዳዲ በበኩላቸው፣ አፍሪካ ከዓለም አቀፍ ሚዲያዎች የምትፈልገው አድሏዊ ዘገባ ሳይሆን እውነተኛ እና ፍትሃዊ ሽፋን መሆኑን አሳስበዋል። የአልጀዚራ የኢትዮጵያ ቢሮ ሃላፊ መሐመድ ተወከል፣ ተቋሙ የድምፅ አልባዎች ድምፅ ለመሆን የተቋቋመ መሆኑን አስታውሰዋል። የዝግጅቱ ተሳታፊዎች ሚዲያዎች ስለ አፍሪካ ሲዘግቡ ከግጭት እና ከሰብአዊ ቀውሶች ባሻገር የአህጉሪቱን እድገት እና ባህላዊ እሴቶች ማሳየት እንዳለባቸው አፅንኦት ሰጥተዋል።