የኢትዮጵያ ኣየር መንገድ ናብ ደርባን ዝገብሮ መዓልታዊ በረራ ክጅምርን 10 ናይ ቦይንግ ፅዕነት ኣውሮፕላናት ክእዝዝን እዩ

የኢትዮጵያ ኣየር መንገድ ካብ ታሕሳስ 2 ጀሚሩ ናብ ደቡብ ኣፍሪቃ ከተማ ደርባን ዝገብሮ መዓልታዊ ናይ ተጓዓዝቲ በረራ ከምብሓዲሽ ክጅምር ምዃኑ ኣፍሊጡ። እዚ ናብ ደርባን ዝግበር በረራ ካብ ዮሃንስበርግን ኬፕታውንን ብምስዕብ ኣብ ደቡብ ኣፍሪቃ ናይቲ ኣየር መንገድ ሳልሰይቲ መዕረፎ ክትከውን እያ። እቲ ዝሕደስ ዘሎ መስመር በረራ ነታ ናይ ወደብ ከተማ ምስ ናይቲ ኣየር መንገድ ኣህጉራዊ መሬብ ከተኣሳስራ እዩ። ብተወሳኺ እቲ ኣየር መንገድ ናይ ፅዕነት ኣገልግሎት ዓቕሙ ንምስፋሕ ካብ ቦይንግ ኩባንያ 10 ናይ ፅዕነት ኣውሮፕላናት ንምእዛዝ ምስቲ ኩባንያ ሓዲሽ ውዕል ተኣታትዩ ኣሎ። እዚ ውዕል እዚ ናይቲ ኣየር መንገድ ናይ ፅዕነት ኣውሮፕላናት ሓይሊ ብርቱዕ ብዝኾነ መገዲ ዘስፋሕፍሕ እዩ።