Loltoonni Ertira Adaagiraat galan; humnoonni mootummaa Aaguulaa fi Hagereselam to'achaa jiru

Jiraatonni magaalaa Adaagiraat loltoonni Ertira magaalaa isaanii galuu fi gara Maqalee imalaa akka jiran miidiyaaleen addunyaa adda addaatti himaniiru. Jiraatonni loltoonni kunneen naannoo Zaalaanbasaa fi Faatsii keessatti mul'achuu isaanii fi naannoo sana keessatti iddoo jireenyaa qopheeffachuu isaanii dubbataniiru. Kana dura qaamoleen mootummaa federaalaa loltoonni Ertira waraana keessatti hirmaachuu isaanii mirkaneessuun ni yaadatama.

Gama biraatiin, Raayyaan Ittisa Biyya Itoophiyaa fi humnoonni nagaa Tigraay magaalaa Aaguulaa, kaaba Maqalee irraa argamtu to'achuu isaanii gabaafameera. Akkasumas humnoonni mootummaa gara kibba-lixaa Maqalee, magaalaa Hagar-Salaam jedhamtu ga'uu isaanii eerameera. Naannolee kana lameenitti walitti bu'iinsi cimaan akka turee fi humnoonni Tigraay gara Wukrootti gorachuu isaanii gabaasni kun ni ibsa.