ኣብ ከተማ ጋምቤላ ናይ ሰዓታት እገዳን ናይ ምንቅስቓስ ክልከላን ተገይሩ

ኣብ ከተማ ጋምቤላ ንዝሓለፉ ኣዋርሕ እናተፈጸሙ ዝጸንሑ ናይ ጸጥታ በረበራትን ቅትለት ንጹሃንን ስዒቡ፡ ኮሚሽን ፖሊስ እቲ ክልል ናይ ሰዓታት እገዳን ናይ ምንቅስቓስ ክልከላን ኣዊጁ። እቲ መጥቃዕቲ ካብ መስከረም ጀሚሩ ናብታ ከተማ ድሕሪ ምስፍሕፋሑ፡ ብፍላይ ትማሊ ብዕጥቅቲ ሓይልታት ዝተፈጸመ መጥቃዕቲ ህይወት ኣርባዕተ ሰባት ከም ዝሓለፈ ተገሊጹ። ስድራቤት እቶም ግዳያት አስከሬን ሒዞም ናብ ቤት ምኽሪ እቲ ክልል ኣብ ዝኸዱሉ እዋን ግጭት ተለዓዒሉ፡ ቤት ጽሕፈታት መንግስትን ትካላት ንግድን ከም ዝተቓጸሉ ተፈሊጡ። ፖሊስ እቲ ክልል ነቶም ገበንቲ ንምሓዝ ምስ ፈደራላዊ ሓይልታት ጸጥታ እናሰርሐ ምዃኑ ብምግላጽ፡ ህዝቢ ካብ ዘይተረጋገጹ ሓበሬታታትን ካብ ዘይሕጋዊ ቅስቀሳታት ክጥንቀቕ ኣተሓሳሲቡ። ካብ ሎሚ ምሸት ጀሚሩ ኣብ ዝተግበር እገዳ፡ ካብ ሰዓት 12 ምሸት ክሳብ 12 ንግሆ ዝኾነ ይኹን ምንቅስቓስ ሰባትን መካይንን ብጥብቂ ተኸልኪሉ ኣሎ። ከምኡውን ካብ ፍቓድ ዘለዎም ኣካላት ጸጥታ ወጻኢ ኣጽዋር ሒዝካ ምንቅስቓስ ብሕጊ ከም ዝተኸልከለ ተገሊጹ።