የአውሮፓ ህብረት ልዩ መልእክተኛ አኔት ዌበር የኢትዮጵያ ጉብኝታቸውን አጠናቀቁ

የአውሮፓ ህብረት የአፍሪካ ቀንድ እና የቀይ ባህር ቀጠና ልዩ መልእክተኛ አኔት ዌበር በኢትዮጵያ ያደረጉትን ጉብኝት አጠናቀዋል። መልእክተኛዋ በቆይታቸው ከኢትዮጵያ መንግሥት፣ ከአፍሪካ ህብረት እና ከሌሎች አጋሮች ጋር በሰላም ማስከበር ጉዳዮች ዙሪያ ውይይት አድርገዋል። ከዚሁ ጋር በተያያዘ የጠቅላይ ሚኒስትሩ የምስራቅ አፍሪካ ጉዳዮች አማካሪ አቶ ጌታቸው ረዳ፣ ከልዩ መልእክተኛዋ እና በኢትዮጵያ ከአውሮፓ ህብረት አምባሳደር ሶፊ ጋር ተወያይተዋል። አቶ ጌታቸው በአስመራ ያለው አገዛዝ ቀጠናውን ለማወክ እያደረገ ስላለው እንቅስቃሴ እና በጊዜው እርምጃ ካልተወሰደ ስለሚኖረው ጉዳት ማብራሪያ ሰጥተዋል። ሁለቱም ወገኖች ቀጣናዊ ውጥረትን ለመቀነስ በቅንጅት ለመስራት ተስማምተዋል። ጉብኝታቸውን ያጠናቀቁት አኔት ዌበር፣ ብራሰልስ በመሄድ ለአውሮፓ ህብረት የፖለቲካ እና የፀጥታ ኮሚቴ (PSC) ወቅታዊ ሁኔታውን አስመልክቶ ገለፃ አድርገዋል።