ፍሉይ ልኡኽ ሕብረት ኤውሮጳ ኣኔት ዌበር ናይ ኢትዮጵያ ዑደተን ዛዚመን

ፍሉይ ልኡኽ ሕብረት ኤውሮጳ ንቀርኒ ኣፍሪቃን ቀይሕ ባሕርን ኣኔት ዌበር ናይ ኢትዮጵያ ዑደተን ዛዚመን። እተን ልኡኽ ኣብ ዝነበረን ፃንሒት ምስ መንግስቲ ኢትዮጵያ፣ ምስ ሕብረት ኣፍሪቃን ካልኦት መሻርኽትን ኣብ ጉዳይ ምርግጋፅ ሰላም ዘትየን። ኣብዚ ከይዲ ድማ ኣማኻሪ ቀዳማይ ሚኒስትር ጉዳያት ምብራቕ ኣፍሪቃ ኣቶ ጌታቸው ረዳ ምስ ፍሉይ ልኡኽን ምስ ኣምባሳደር ሕብረት ኤውሮጳ ኣብ ኢትዮጵያ ሶፊን ተዘራሪቦም። ኣቶ ጌታቸው ኣብ ኣስመራ ዘሎ ስርዓትን ደገፍቱን ንዞባና ንምዝራግ ዘካይድዎ ዘለዉ ምንቅስቓስ ብምሕባር፣ ብግዜኡ ስጉምቲ እንተዘይተወሲዱ ዝኽእል ጉድኣት ኣረዲኦም። ክልቲኦም ወገናት ውጥረት ንኸይዓቢ ብምትሕብባር ንምስራሕ ተሰማሚዖም። ዑደተን ዝዛዘማ ኣኔት ዌበር ናብ ብራስለስ ብምኻድ ንኮሚተ ፖለቲካን ፀጥታን ሕብረት ኤውሮጳ (PSC) ኣብ ኩነታት ኢትዮጵያን እቲ ዞባን መግለጺ ሂበን።