ፌደራል ፖሊስ ከ200 ሚሊዮን ብር በላይ የዘረፉ 37 ተጠርጣሪዎችን በቁጥጥር ሥር አዋለ

የኢትዮጵያ ፌደራል ፖሊስ በ658 ዜጎች ላይ ከ200 ሚሊየን ብር በላይ ማጭበርበር የፈፀሙ 37 ተጠርጣሪዎችን በቁጥጥር ሥር አውሏል። ተጠርጣሪዎቹ የባንክ ሰራተኛ በመምሰል ደንበኞችን በመጥራት እንደ ሽልማት፣ የስርዓት ማሻሻያ ወይም ከፋይዳ መታወቂያ ጋር ማስተሳሰር በሚሉ ሰበቦች የይለፍ ቃል እና ሚስጥራዊ መረጃዎችን በመውሰድ ሲያጭበረብሩ እንደነበር ታውቋል። ወንጀለኞቹ በተደራጀ መልኩ የተለያዩ ሰዎች ስም የወጡ የባንክ አካውንቶችንና ሲም ካርዶችን በመጠቀም ይህን ህገ-ወጥ ድርጊት ሲፈፅሙ ቆይተዋል።

ፖሊስ ወንጀለኞቹን ሲይዝ 9 ተሽከርካሪዎችን፣ 114 ስልኮችንና 478 ሲም ካርዶችን በኤግዚቢሽንነት መያዙን አስታውቋል። በጉዳዩ የተጎዱ ዜጎች በ991 ወይም በፌደራል ፖሊስ መተግበሪያ ጥቆማ እንዲሰጡ ጥሪ ቀርቧል። በተመሳሳይ ባንኮች በግል ስልክ ደውለው ሚስጥራዊ መረጃ እንደማይጠይቁ ህብረተሰቡ እንዲያውቅ ፖሊስ አስገንዝቧል።