ፌዴራል ፖሊስ ልዕሊ 200 ሚሊዮን ብር ዘሪፎም ዝነበሩ 37 ተጠርጠርቲ ኣብ ትሕቲ ቁጽጽር ኣውዒሉ

ፖሊስ ፌዴራል ኢትዮጵያ ኣብ ልዕሊ 658 ዜጋታት ልዕሊ 200 ሚሊዮን ብር ብምጭበርባር ዝተጠርጠሩ 37 ውልቀሰባት ኣብ ትሕቲ ቁጽጽር ኣውዒሉ ኣሎ። እቶም ተጠርጠርቲ ሰራሕተኛታት ባንኪ ብምምሳል ንዓማዊል ብምድዋል ከም ሽልማት፡ ምምሕያሽ ሲስተም ባንኪ ወይ ምስ መለለዪ ፋይዳ ምትእስሳር ብዝብሉ ምኽንያታት ሓበሬታታት ምስጢር ብምሕታት ክጭብርብሩ ከምዝነበሩ ተገሊጹ። እቶም ተጠርጠርቲ ብጉጅለ ብምውዳብ ኣብ ዝተፈላለዩ ሰባት ዝወጹ ናይ ባንኪ ኣካውንታትን ሲም ካርድታትን ብምጥቃም እቲ ገበናዊ ተግባር ይፍጽሙ ከምዝነበሩ ፖሊስ ሓቢሩ።

ፖሊስ ነቶም ተጠርጠርቲ ኣብ ዝሓዘሉ እዋን 9 መካይን፡ 114 ስልካትን 478 ሲም ካርድታትን ሒዙ ኣሎ። ኣብቲ ጉዳይ ጉድኣት ዝበጽሖም ሰባት ብቁጽሪ 991 ወይ ብኣፕሊኬሽን ፌዴራል ፖሊስ ሓበሬታ ክህቡ ጻውዒት ቀሪቡ። ብተወሳኺ ባንክታት ብሕታዊ ስልኪ ደዊለን ኣገልግሎት ከምዘይህባ ዝዘከረ ፖሊስ፡ ሕብረተሰብ ዝኾነ ነገር እንተጋጢሙዎ ብቁጽሪ 991 ክሕብር ኣጠንቂቑ።