Poolisiin Federaalaa shakkamtoota miliyoona 200 ol saaman 37 to'annoo jala oolche

Poolisiin Federaalaa Itiyoophiyaa namoota 658 irraa qarshii miliyoona 200 ol haxxummaadhaan saaman 37 to'annoo jala oolcheera. Shakkamtoonni kun gareedhaan gurmaa'uun hojjettoota baankii fakkaachuudhaan, abbaa qabeenyaa herrega baankii waamuun badhaasni akka qaqqabe, sirni baankii akka haaromu ykn herregni isaanii ID Faydaa wajjin akka wal qabatu himuudhaan iccitiiwwan garaa garaa fi jecha darbiinsa (password) saamaniiru. Gareen kun manaa kireeffachuudhaan maqaa namoota gara garaatiin herrega baankii fi SIM kaardiiwwan hedduu fayyadamuun yakka kana raawwachaa turan.

Poolisiin yeroo shakkamtoota kana qabu konkolaattota 9, bilbiloota 114 fi SIM kaardiiwwan 478 qabuu isaa ibseera. Miidhamtoonni lakkoofsa 991 ykn appii poolisii federaalaatti gargaaramuudhaan odeeffannoo akka kennan waamicha dhiyeessera. Gama biraatiin, baankonni bilbila dhuunfaatiin bilbilanii iccitii akka hin gaafanne yaadachiisuun, hawaasni of eeggannoo akka godhu gorsera.