በዋግ ኽምራ አበርገሌ ወረዳ ከ72 ሺህ በላይ ሰዎች አስቸኳይ ዕርዳታ ይፈልጋሉ

በዋግ ኽምራ አስተዳደር አበርገሌ ወረዳ በኤልኒኖ ምክንያት በተከሰተው ከባድ ድርቅ ከ80 ሺህ በላይ ከሚሆኑት ነዋሪዎች ውስጥ ከ72 ሺህ በላይ የሚሆኑት አስቸኳይ የምግብ ዕርዳታ እንደሚፈልጉ የወረዳው ግብርና ልማት ጽሕፈት ቤት አስታውቋል። በወረዳው ከሚለማው መሬት ከ90 በመቶ በላይ የሚሆነው ሰብል ምርት ሳይሰጥ ቀርቷል።

ድርቁ በእንስሳት ላይም ከፍተኛ ጉዳት ያደረሰ ሲሆን ከ27 ሺህ በላይ በጎችና ፍየሎች እንዲሁም ሌሎች ከብቶች መሞታቸው ተገልጿል። ችግሩን መቋቋም ያቃታቸው ከ1,500 በላይ ነዋሪዎች ቤታቸውን ዘግተው መሰደዳቸው የተገለጸ ሲሆን፣ የአካባቢው አመራሮችና ነዋሪዎች ፈጣን የምግብና የመኖ አቅርቦት እንዲደረግ ጥሪ አቅርበዋል።