ኣብ ወረዳ ኣበርገሌ ልዕሊ 72 ሺሕ ሰባት ህጹጽ ረድኤት ምግቢ የድልዩ

ኣብ ምምሕዳር ዋግ ኽምራ ወረዳ ኣበርገሌ ብሰንኪ ኤልኒኖ ብዘጋጠመ ጽኑዕ ደርቂ፡ ካብቶም ልዕሊ 80 ሺሕ ዝኾኑ ነበርቲ እታ ወረዳ፡ ልዕሊ 72 ሺሕ ዝኾኑ ህጹጽ ረድኤት ምግቢ ከምዝደልዩ ቤት ጽሕፈት ልምዓት ሕርሻ እታ ወረዳ ኣፍሊጡ። ልዕሊ 90 ሚእታዊት እቲ ኣብ 17,941 ሄክታር ዝለምዐ መሬት ዝነበረ እኽሊ ፍርያት ከምዘይሃበ ተገሊጹ።

እቲ ደርቂ ኣብ እንስሳታት እውን ዓቢ ጉድኣት ኣውሪዱ ኣሎ፤ ልዕሊ 27 ሺሕ በጊዕን ድቤላን ከምኡውን ካልኦት ከብትን ዶሮታትን ከምዝሞቱ ተገሊጹ። እቲ ጸገም ክጻወሩ ዘይከኣሉ ልዕሊ 1,500 ነበርቲ ኣባይቶም ዓጽዮም ከምዝተሰዱ ዝተሓበረ ኮይኑ፡ መራሕቲ እታ ወረዳን ነበርትን ህጹጽ ረድኤት ምግቢን መግብን እንስሳን ክቐርበሎም ጻውዒት ኣቕሪቦም ኣለዉ።