Keeniyaa: Paasterii lubbuu namoota 191 galaafate irratti himanni dhiyaate

Keeniyaatti, paasteriin gaggeessaa amantii kan ta'an Pool Maakenzii fi hordoftoonni isaa 29 namoota 191 galaafatan jechuun himataman. Namoonni du'an keessaa hedduun isaanii daa'imman yoo ta'an, paasterichi "Waaqayyo wajjin wal arguuf" jedhanii akka sooman gochuun lubbuun isaanii akka darbu taasisaniiru. Paasterichi fi hordoftoonni isaa himannicha "nu hin ilaallatu" jechuun fudhachuu didaniiru.

Abbootiin taayitaa bosona Shaakahoolaa keessatti reeffa 400 ta'u awwaala keessaa baasuu isaanii beekameera. Ragaaleen akka ibsanitti, daa'imman tokko tokko harka fi miilli isaanii hidhamee argamuu isaanii BBCtti himaniiru. Barsiifanni paasterichaa qoricha ammayyaa fi barnoota akka mormu ibsameera.