በሕጻናት ላይ እየጨመረ የመጣው የኩላሊት ህመም አሳሳቢ ደረጃ ላይ ደረሰ

ሜሪ ጆይ ኢትዮጵያ በሀገሪቱ የኩላሊት ህመም በከፍተኛ ሁኔታ እየጨመረ መምጣቱን አስታወቀ። የድርጅቱ መስራች ሲስተር ዘቢደር ዘውዴ እንደገለጹት፣ ከዚህ ቀደም በአረጋውያን ላይ ብቻ ይከሰት የነበረው ይህ ህመም አሁን ላይ ሕጻናትን ጭምር እያጠቃ ነው። ህመሙ እስከ 90 በመቶ ጉዳት እስኪያደርስ ድረስ ምልክት ስለማያሳይ "ዝምተኛ ገዳይ" ተብሎ ይጠራል።

ሜሪ ጆይ በአዲስ አበባ፣ ሀዋሳ እና አርባ ምንጭ የኩላሊት እጥበት ማዕከላትን በመክፈት አገልግሎት እየሰጠ ነው። ታካሚዎች ህመሙን የሚያውቁት በአጋጣሚ ለሌላ ምርመራ ሲሄዱ ብቻ በመሆኑ ግንዛቤ ሊፈጠር ይገባል። የኩላሊት ጤናን ለመጠበቅ ጨው፣ ስኳር እና በሐኪም ያልታዘዙ መድኃኒቶችን መቀነስ እንዲሁም በቂ ውሃ መጠጣት ወሳኝ መሆኑን ባለሙያዎች ይመክራሉ።