የኩላሊት ህመም በህጻናት ላይ እየጨመረ መምጣቱ አሳሳቢ ሆኗል - ሜሪ ጆይ ኢትዮጵያ

የሜሪ ጆይ ኢትዮጵያ መስራች ሲስተር ዘቢደር ዘውዴ፣ ቀደም ሲል በአረጋውያን ብቻ ይታይ የነበረው የኩላሊት ህመም በአሁኑ ወቅት በሕጻናት ላይ በስፋት እየታየ መሆኑን አስታወቁ። ህመሙ እስከ 90 በመቶ ጉዳት እስኪያደርስ ድረስ ምልክት ላያሳይ የሚችል "ዝምተኛ ገዳይ" መሆኑን የገለጹት ሲስተር ዘቢደር፣ በሀዋሳ፣ አዲስ አበባ እና አርባ ምንጭ የተከፈቱ የኩላሊት እጥበት ማዕከላት ከስምንት ዓመት ዕድሜ ጀምሮ ያሉ ታዳጊዎችን እያከሙ እንደሚገኙ ተናግረዋል። አብዛኛዎቹ ታካሚዎች ህመማቸውን የሚያውቁት ለሌሎች የጤና ምርመራዎች በሄዱበት ወቅት ነው። ተቋሙ ህብረተሰቡ የግንዛቤ ማስጨበጫ ስራዎችን እንዲያጠናክር ጥሪ ያቀረበ ሲሆን፣ በቂ ውሃ መጠጣት፣ የስኳርና የጨው መጠንን መቀነስ የኩላሊት ጤናን ለመጠበቅ ወሳኝ መሆናቸውን አስገንዝቧል።