በፊንጫኣ ስኳር ፋብሪካ በተፈጸመ ጥቃት የ5 ሰዎች ህይወት አለፈ

በምዕራብ ኦሮሚያ ሱሉላ ፍንጫኣ ወረዳ በሚገኘው የፊንጫኣ ስኳር ፋብሪካ ላይ የታጠቁ ቡድኖች ጥቃት ፈጽመዋል። በደረሰው ጥቃት አራት ሚሊሻዎች እና አንድ ሰላማዊ ሰው ህይወታቸው ያለፈ ሲሆን፣ ሁለት የፋብሪካው ሰራተኞች ታግተው ተወስደዋል። የአካባቢው ነዋሪዎች እንደገለጹት፣ የኢትዮጵያ ንግድ ባንክ ቅርንጫፍ ተዘርፏል እንዲሁም ወደ 40 የሚጠጉ ሞተር ሳይክሎች እና አራት ተሽከርካሪዎች በእሳት ወድመዋል።

ጥቃቱ የተፈጸመው ትላንት ማለዳ 11 ሰዓት ገደማ ሲሆን፣ የጸጥታ ኃይሎች በወሰዱት አጸፋዊ እርምጃ የድሮን ድብደባ እንደተካሄደ ተዘግቧል። ይሁን እንጂ በታጣቂዎቹ ላይ የደረሰውን ጉዳት ማረጋገጥ አልተቻለም። የፋብሪካው አመራሮች እና የሚመለከታቸው አካላት ስለ ክስተቱ እስካሁን አስተያየት አልሰጡም። ፋብሪካው በግንቦት 2015 ዓ.ም ተመሳሳይ ጥቃት ደርሶበት የቢሊዮን ብር ኪሳራ ማስተናገዱ ይታወሳል።