ኣብ ፋብሪካ ሽኮር ፊንጫኣ ኣብ ዝተፈጸመ መጥቃዕቲ 5 ሰባት ተቐቲሎም

ኣብ ምዕራብ ኦሮሚያ ሱሉላ ፊንጫኣ ወረዳ ኣብ ዝርከብ ፋብሪካ ሽኮር ፊንጫኣ ዕጡቓት መጥቃዕቲ ፈጺሞም። በቲ መጥቃዕቲ ኣርባዕተ ሚሊሻታትን ሓደ ሲቪልን ህይወቶም ዝሓለፈ ኮይኑ፡ ክልተ ሰራሕተኛታት ፋብሪካ ድማ ተጨውዮም ተወሲዶም። ነበርቲ ከም ዝገለጽዎ፡ ጨንፈር ባንኪ ንግዲ ኢትዮጵያ ከም ዝተዘምተን፡ ኣስታት 40 ሞተር ሳይክላትን ኣርባዕተ መካይንን ከም ዝተቓጸለን ሓቢሮም።

እቲ መጥቃዕቲ ትማሊ ንግሆ ሰዓት 11 ዝተፈጸመ ኮይኑ፡ ሓይልታት ጸጥታ ኣብ ዝወሰድዎ ስጉምቲ መጥቃዕቲ ድሮን ከም ዝተኻየደ ተገሊጹ። ይኹን እምበር ኣብቶም ዕጡቓት ዝወረደ ጉድኣት ንምርግጋጽ ኣይተኻእለን። መራሕቲ እቲ ፋብሪካን ዝምልከቶም ኣካላትን ብዛዕባ እቲ ፍጻሜ ክሳብ ሕጂ ርኢቶ ኣይሃቡን። እቲ ፋብሪካ ብግንቦት 2015 ተመሳሳሊ መጥቃዕቲ በጺሕዎ ቢልዮናት ብር ክሳራ ከም ዝገጠሞ ይዝከር።