ኣብ ወረዳ ዝቋላ ዋግ ኽምራ ልዕሊ 74 ሽሕ ሰባት ህጹጽ ሓገዝ ከምዘድልዮም ተገሊጹ

ኣብ ዞባ ዋግ ኽምራ ወረዳ ዝቋላ ብሰንኪ ኤልኒኖ ዘጋጠመ ፅዑቕ ደርቂ ልዕሊ 74 ሽሕ ነበርቲ ህጹጽ ሓገዝ መግቢ ከምዘድልዮም ተገሊጹ። ኣማሓዳሪ ወረዳ ኣቶ ታፈረ ሚሰነ ከምዝገለጽዎ፣ ካብ ጠቕላላ ህዝቢ እቲ ወረዳ 74,161 ሰባት ህጹጽ ሓገዝ ዝደልዩ እንትኾኑ፣ ንዕኦም ንምሕጋዝ ድማ 133,490 ኩንታል እኽሊ ብቕልጡፍ የድሊ።

እቲ ደርቂ ንመግቢ ሰባት ጥራይ ዘይኮነስ፣ ልዕሊ 11 ሽሕ እንስሳት ብሞት ንክስኣኑ፣ ልዕሊ 40 ሽሕ እንስሳት ድማ መዓርፎ ሳዕሪ ንምድላይ ክስደዱ ገይሩ እዩ። ነበርቲ እቲ ከባቢ እቶም ጸገማት ማይ መስተን መግቢን ንኩነታቶም ኣዚዩ ከምዘመረሮ ብምግላጽ፣ መንግስትን ኣካላት ሓገዝን ብቕልጡፍ ኢዶም ንክሰዱ ፃውዒት ኣቕሪቦም ኣለዉ።