የመግጭ መስኖ ግድብ በጠቅላይ ሚኒስትር ዐቢይ አሕመድ ተመረቀ

ጠቅላይ ሚኒስትር ዐቢይ አሕመድ በጎንደር የሚገኘውን የመግጭ መስኖ ግድብ ፕሮጀክት መርቀው ከፍተዋል። ፕሮጀክቱ 185 ሚሊዮን ሜትር ኩብ ውሃ የመያዝ አቅም ያለው ሲሆን ከ17 ሺህ ሄክታር በላይ መሬትን በመስኖ በማልማት በአስር ሺዎች የሚቆጠሩ አርሶ አደሮችን ተጠቃሚ ያደርጋል። ግድቡ ለጎንደር ከተማ እና አካባቢዋ ንጹህ የመጠጥ ውሃ ከማቅረብ ባሻገር፣ በአሳ እርባታ፣ በቱሪዝም እና በከተማ ግብርና ዘርፍ ለወጣቶች የስራ ዕድል እንደሚፈጥር ተገልጿል።

ጠቅላይ ሚኒስትሩ በንግግራቸው ፕሮጀክቱ ረጅም ዓመታት የቆየ የመጓተት ችግር እንደነበረበት አንስተው፣ በአሁኑ ወቅት የመደመር እሳቤን በመተግበር ስኬታማ መደረጉን ገልጸዋል። የኢትዮጵያ እድገት ሁሉንም አካባቢዎች ያካተተ እንዲሆን መንግስት በትጋት እንደሚሰራ የገለጹት ጠቅላይ ሚኒስትሩ፣ የጎንደር ህዝብ ለቀጣይ ልማቶች በንቃት እንዲሳተፍ ጥሪ አቅርበዋል።