ቀዳማይ ሚኒስትር ዐቢይ ኣሕመድ ፕሮጀክት መስኖ መግጭ ኣመሪቖም

ቀዳማይ ሚኒስትር ዐቢይ ኣሕመድ ኣብ ጎንደር ዝርከብ ፕሮጀክት መስኖ መግጭ ኣመሪቖም ከፊቶም። እቲ ፕሮጀክት 185 ሚልዮን ሜትሮ ኩቢክ ማይ ክሕዝ ዝኽእል ኮይኑ፡ ልዕሊ 17 ሽሕ ሄክታር መሬት ብመስኖ ብምልማዕ ንዓሰርተታት ኣሽሓት ሓረስቶት ተጠቃሚ ከምዝገብር ተገሊጹ። እቲ ግድብ ንከተማ ጎንደርን ከባቢኣን ጽሩይ መስተ ማይ ካብ ምቕራብ ሓሊፉ፡ ብዓሳ መግቢ፡ ቱሪዝምን ከተማዊ ሕርሻን ንመንእሰያት ናይ ስራሕ ዕድል ከምዝፈጥር ተሓቢሩ ኣሎ።

እቶም ቀዳማይ ሚኒስትር ኣብ ዘረብኦም፡ እቲ ፕሮጀክት ንነዊሕ ዓመታት ናይ ምድንጓይ ጸገም ከምዝነበሮ ኣልዒሎም፡ ሕጂ ግን ራኢ 'መደመር' ብምትግባር ከምዝተዓወተ ገሊጾም። ዕቤት ኢትዮጵያ ኩለን ክልላት ዘጠቓለለ ንክኸውን መንግስቲ ብትግሃት ከምዝሰርሕ ዝገለጹ እቶም ቀዳማይ ሚኒስትር፡ ህዝቢ ጎንደር ንቀጻሊ ልምዓት ብንቕሓት ክሳተፍ ጸዊዖም።