በሞያሌ ከተማ የተቀሰቀሰው ግጭት ተባብሶ ቀጠለ፤ ነዋሪዎች ወደ ኬንያ እየተሰደዱ ነው

በሞያሌ ከተማ በክልል ባንዲራ አጠቃቀም ሰበብ የተቀሰቀሰው ግጭት ዛሬም ተባብሶ መቀጠሉን ነዋሪዎች ገለጹ። ነዋሪዎቹ የከባድ መሳርያ ተኩስ ድምፅ እንደሚሰማና መኖሪያ ቤቶችና የንግድ ተቋማት እየወደሙ መሆኑን ተናግረዋል። በግጭቱ የሰው ህይወት መጥፋቱ የተገለጸ ሲሆን በሺዎች የሚቆጠሩ ነዋሪዎችም ድንበር አቋርጠው ወደ ኬንያ በመሸሽ ላይ ይገኛሉ።

የኬንያ ቀይ መስቀል ተፈናቃዮቹን እየረዳ እንደሚገኝ ተገልጿል። ነዋሪዎቹ የፌዴራል መንግስት ሁኔታውን በመቆጣጠር ዘላቂ መፍትሄ እንዲሰጥ ጥሪ አቅርበዋል። በሞያሌ ከተማ ባለው የአስተዳደር መዋቅር አወቃቀር ሳቢያ ከዚህ ቀደም በተደጋጋሚ ግጭቶች ተከስተው እንደነበር ይታወሳል።