የቅዱስ ሲኖዶስ ምልኣተ ጉባኤ ተከፈተ

የኢትዮጵያ ኦርቶዶክስ ተዋህዶ ቤተክርስቲያን ቅዱስ ሲኖዶስ ምልኣተ ጉባኤ በዛሬው ዕለት ተከፍቷል። የቤተክርስቲያኗ ፓትርያርክ ብፁዕ ወቅዱስ አቡነ ማትያስ በንግግራቸው፤ ጉባኤው በቤተክርስቲያኗ የአስተዳደር፣ የሀብት አያያዝ እና የወንጌል አገልግሎት ላይ የሚታዩ ክፍተቶችን በዘላቂነት ለመፍታት እንደሚያተኩር ገልጸዋል። በሀገር ውስጥ እና በውጭ አህጉረ ስብከት ያሉ የሰው ኃይል እና የሥራ አፈጻጸም ችግሮች በሰፊው ይዳሰሳሉ ተብሎ ይጠበቃል።

ከዚህ በተጨማሪ ፓትርያርኩ ቤተክርስቲያኗ ለሀገራዊ ሰላም ያላትን ሚና አጽንኦት ሰጥተዋል። በኢትዮጵያ ህዝብ ላይ እየደረሰ ያለውን መከራ ለመቀነስ የቤተክርስቲያኗ አባቶች ከጸሎት ባሻገር የማግባባት፣ የማስታረቅ እና የማስማማት ስራ መስራት እንደሚጠበቅባቸው አስገንዝበዋል። ለዚህም ለባለድርሻ አካላት የሰላም ጥሪ እንደሚተላለፍ ጠቅሰዋል።