የትግራይ ሰላም ኃይል በአድዋ አካባቢ የተበላሸ የብር ኖት ማግኘቱን አስታወቀ

የትግራይ የሰላም ኃይል በአድዋ ከተማ አካባቢ በጆንያ ውስጥ ተከማችቶ የተገኘ እና በከፍተኛ ሁኔታ የተበላሸ የብር ኖት ማግኘቱን አስታውቋል። የኃይሉ የሚዲያና ኮሙኒኬሽን ኃላፊ መንግስተዓብ ተስፋይ እንደገለጹት፤ በአካባቢው ነዋሪዎች ጥቆማ በተደረገ ፍተሻ በምሽግ ጉድጓድ ውስጥ የተደበቀ እና አሲድ የፈሰሰበት፣ የተቃጠለ እንዲሁም የተቀዳደደ የ200 ብር ኖት መገኘቱን ተናግረዋል። ኃላፊው በቦታው ቢያንስ ስድስት ወይም ሰባት ጆንያዎች እንደታዩ ገልጸው፣ ከእነዚህ ውጪም ብዙ የተበተነ ገንዘብ እንዳለ አክለዋል። በማህበራዊ ሚዲያ ሲሰራጭ የነበረው “ከ2 እስከ 3 ቢሊዮን ብር ተገኘ” የሚለው መረጃ ግን ሀሰተኛ መሆኑን አስተባብለዋል። በአሁኑ ወቅት የገንዘቡን ትክክለኛነት እና መጠን ለማረጋገጥ ከፌዴራል ተቋማት ባለሙያዎች እየተጣራ እንደሚገኝ ተገልጿል።