ሓይሊ ሰላም ትግራይ ኣብ ከባቢ ዓድዋ ዝተበላሸ ናይ ኢትዮጵያ ባንክኖታት ከምዝረኸበ ኣፍሊጡ

ሓይሊ ሰላም ትግራይ ኣብ ከባቢ ከተማ ዓድዋ ኣብ ጆንያታት ተኣኪቡ ዝነበረን ብብርቱዕ ዝተበላሸወን ባንክኖታት ከምዝረኸበ ኣፍሊጡ። ሓላፊ ሚድያን ኮሙኒኬሽን እቲ ሓይሊ መንግስተዓብ ተስፋይ ከምዝገለጽዎ፤ ብመሰረት ሓበሬታ ነበርቲ ኣብ ዘካይድዎ ፍተሻ ኣብ ጉድጓድ ተቐቢሩ ዝነበረ፣ ብአሲድ ዝተበላሸወ፣ ዝተቓጸለን ዝተረተረን ናይ 200 ቅርሺ ባንክኖታት ተረኺቡ። እቲ ሓላፊ ኣብቲ ቦታ እንተወሓደ ሽዱሽተ ወይ ሸውዓተ ጆንያታት ከምዝረኣዩን፣ ካብዚ ወጻኢ እውን ብዙሕ ዝተበታተነ ገንዘብ ከምዘሎን ኣረዲኦም። ኣብ ማሕበራዊ ሚዲያ ክዝርጋሕ ዝጸንሐ “ካብ 2 ክሳብ 3 ቢሊዮን ቅርሺ ተረኺቡ” ዝብል ሓበሬታ ግና ሓሶት ምዃኑ ኣፍሊጦም። ብዛዕባ እቲ ገንዘብ ትክክለኝነቱን መጠኑን ንምርግጋጽ ካብ ትካላት ፈደራል ሰባት ተላኢኾም መጽናዕቲ ይግበር ከምዘሎ ተገሊጹ።