መበል 119 ዓመት በዓል ሰራዊት ምክልኻልን ሕቶ ቀይሕ ባሕርን

ሰራዊት ምክልኻል ኢትዮጵያ መበል 119 ዓመት በዓል ሰራዊት "ሰራዊት ዓወት" ብዝብል መሪ ቃል ኣብ ኣዲስ ኣበባ ኣኽቢሩ። ኣብቲ ስነ-ስርዓት ዘረባ ዘስምዑ ሓለቓ ስታፍ ሓይልታት ምክልኻል ፊልድ ማርሻል ብርሃኑ ጁላ፣ ኢትዮጵያ ካብ ቀይሕ ባሕሪ ተጠቀምቲ ናይ ምዃን መሰላ ከም ዘይትሓድግ ኣረጋጊጾም። ቀይሕ ባሕሪ ናይ ሓባር ረብሓ ኢትዮጵያ ምዃኑ ብምግላጽ፣ እታ ሃገር ብሰላምን ብጽቡቕ ጉርብትናን ናይ ምንባር ድሌታ ኣረጋጊጾም።

ብኻልእ ወገን ፊልድ ማርሻል ብርሃኑ፣ ህወሓት ኣብ ዝሓለፉ ሸሞንተ ዓመታት ዘካየዶም ኣርባዕተ ኲናት ሙሉእ ብሙሉእ ከም ዝተሸነፈ ኣፍሊጦም። ሰራዊት ምክልኻል ውሽጣዊን ግዳማዊን ጸላእቲ ብምዕዋት ኣብቲ ዞባ እሙን ሓይሊ ምዃኑ ዝገለጹ ሓለቓ ስታፍ፣ ምክልኻል ኣፍሪስካ ስልጣን ናይ ምሓዝ ፈተነ ከንቱ ምዃኑ ገሊጾም። ኣብ ልዕሊ መቓብር ምክልኻል ዝቖም መንግስቲ ሽግግር ከም ዘየለ ብምግንዛብ፣ ፖለቲካዊ ቃልሲ ብሰላማዊ መንገዲ ንኽካየድ ጸዊዖም።