Kontiraataan pirojektii daandii Bole Arabsa-ICT Park haqame

Abbaan taayitaa daandiiwwan magaalaa Finfinnee pirojektii ijaarsa daandii Bole Arabsa-ICT Park irratti kontiraata walii galtee haqamuu isaa beeksise. Ijaarsichi dhaabbata ijaarsaa 'Alemayehu Ketema' jedhamuun hojjetamaa kan ture yoo ta'u, suuta deemuusaatiin walii galteen sun akka haqamu ta'eera. Amma hojiin isaa hafe humna mataa abbaa taayitichaan hojjetamaa kan jiru yoo ta'u, daandicha keessatti kan argaman dildootni sadii garuu kontiraaktara biraatiin akka ijaaraman murtaa'eera.

Pirojektichi dheerina kiilomeetira 6 fi bal'ina meetira 60 kan qabu yoo ta'u, bakka namoonni itti deemanii fi bakka magariisaa kan dabalatudha. Yeroo ammaa ijaarsi sub-base bal'inaan gaggeeffamaa jira. Ijaarsichi yeroo xumuramu, buufata xiyyaaraa Bole irraa gara Goro fi Arabsa imaluuf karaa gabaabaa ta'uun cinaatti, cufiinsa tiraafikaa hir'isuuf gumaacha guddaa qabaata.