ኣብ ከተማ ሞያሌ ግጭት ቀጺሉ፡ ነበርቲ መንግስቲ ፌደራል ኢድ ክእትዉ ሓቲቶም

ኣብ ከተማ ሞያሌ ግጭት ከምዘይተወገደ ነበርቲ ይገልጹ። ኣብ ውሽጢ መዓልቲ ተዛማዲ ህድኣት እንተሃለወ እውን፡ ብለይቲ ድማ ሓያል ተኹሲ ይስማዕ ከምዘሎን ኣገልግሎት ኤሌክትሪክን ማይን ከምዝተቛረጸን ይዛረቡ። እቲ ግጭት ናብ ከተማ ዳዲን ከባቢ ወረዳታትን ብምስፋሑ ብዙሓት ሰባት ናብ ዶብ ኬንያን ዞባ ሊባንን ተመዛቢሎም ኣለዉ።

ከምቲ ነበርቲ ዝበልዎ፡ ሓደስቲ ዕጡቓት ጉጅለታት ኣብ ምንቅስቃስ ከምዘለዉ ስለዝተራእየ ስግኣቶም ቀጺሉ ኣሎ። ኣብታ ከተማ ዝርከቡ ቤት ትምህርትታትን ቤት ጽሕፈት ከንቲባን ከምዝተባረሱ ዝተጠቐሰ ኮይኑ፡ ነበርቲ መንግስቲ ፌደራል ቅልጡፍ ስጉምቲ ወሲዱ ሰላም ከስፍን ጻውዒት ኣቕሪቦም ኣለዉ።